1969-ல் அப்பல்லோ விண்கலம் மூலம் நிலவில் மனிதன் கால்பதித்த அந்த வரலாற்றுச் சாதனைக்குப் பிறகு, 50 ஆண்டுகளைக் கடந்தும் நாம் ஏன் இன்னும் அங்கு மீண்டும் செல்லவில்லை என்ற கேள்வி பலருக்கும் எழலாம். நாசாவின் நவீன நிலவுப் பயணத் திட்டமான 'ஆர்டெமிஸ்', மெதுவாகவும் பல தாமதங்களுடனும் நகர்வது பொதுமக்களிடையே ஒருவித சலிப்பை ஏற்படுத்தியுள்ளது. ஆனால், இதற்குப் பின்னால் உள்ள உண்மையான காரணங்கள் தொழில்நுட்ப ரீதியானவை. 1969 ஜூலை மாதம் நீல் ஆம்ஸ்ட்ராங் நிலவில் கால்பதித்த போது, அது "மனிதனின் சிறிய அடி, மனிதகுலத்தின் மிகப்பெரிய பாய்ச்சல்" என்று போற்றப்பட்டது. ஆனால், அத்திட்டம் எவ்வளவு ஆபத்தானது என்பதைப் பலர் மறந்துவிடுகிறார்கள். பனிப்போர் காலத்தின் கட்டாயத்தினால் மிகக் குறுகிய காலத்தில் இத்திட்டம் செயல்படுத்தப்பட்டது. இன்றைய காலக்கட்டத்துடன் ஒப்பிடும்போது, அன்று விண்வெளி வீரர்கள் ஏற்றுக் கொண்ட ஆபத்துகள் மிக அதிகம். அப்பல்லோ 11 தரையிறங்கும்போது கணினியில் எச்சரிக்கைகள் வந்தும், மிஷன் கன்ட்ரோல் "தொடருங்க" என்று கூறியது ஒரு மிகப்பெரிய துணிச்சலான முடிவு. இந்த செய்தியை ஆங்கிலத்தில் படிக்க ஆர்டெமிஸ் திட்டம் என்பது நிலவில் வெறும் கொடியை நடுவதற்காக மட்டும் உருவாக்கப்படவில்லை. நிலவின் தென்பகுதியில், குறிப்பாக பனிக்கட்டிகள் உள்ள இடங்களில் மனிதர்கள் தங்கி ஆய்வு செய்யக்கூடிய ஒரு நிலையான உள்கட்டமைப்பை உருவாக்குவதே இதன் நோக்கம். இதற்காக அப்பல்லோ எதிர்கொள்ளாத புதிய சவால்களை ஆர்டெமிஸ் தீர்க்க வேண்டியுள்ளது. நீண்ட கால உயிர் காக்கும் அமைப்புகள் (Life support systems), மீண்டும் பயன்படுத்தக்கூடிய மற்றும் பாதுகாப்பான லேண்டர்கள், ஆழமான விண்வெளித் தொடர்பு வசதிகள் போன்றவற்றை தீர்க்க வேண்டும். நிலவுக்கு மனிதர்களைத் தரை இறக்குவதற்குப் பல புதிய தொழில் நுட்பங்கள் ஒன்றிணைந்து செயல்பட வேண்டும். இதில் ஏற்படும் சிறு பிழையும் ஒட்டுமொத்தத் திட்டத்தையும் பாதிக்கும். ஹைட்ரஜன் எரிபொருள் கசிவு, ஹீலியம் அழுத்தம் தொடர்பான சிக்கல்கள், ஓரியன் விண்கலத்தின் வெப்பத் தடுப்புக் கவசம் குறித்த கவலைகள் திட்டத்தைத் தாமதப்படுத்துகின்றன. ஸ்பேஸ் எக்ஸ் நிறுவனம் தயாரிக்கும் நிலவு லேண்டர் இன்னும் உருவாக்க நிலையில் இருப்பதால், 2024-இல் நடக்க வேண்டிய பயணம் தற்போது 2028-க்குத் தள்ளப்பட்டுள்ளது. அப்பல்லோ 13 பயணத்தின் போது ஆக்சிஜன் டேங்க் வெடித்து, வீரர்கள் நூலிழையில் உயிர் தப்பிய நிகழ்வு நாசாவின் கலாச்சாரத்தையே மாற்றியது. விண்வெளியில் தோல்விகள் மன்னிக்கப்பட மாட்டாது என்பதை உணர்ந்த நாசா, தற்போது ஆர்டெமிஸ் திட்டத்தில் வேகத்தை விடப் பாதுகாப்பிற்கே முக்கியத்துவம் அளிக்கிறது. தாமதங்கள் இருந்தாலும், ஆர்டெமிஸ் பல வரலாற்றுச் சிறப்புகளைக் கொண்டுள்ளது. நிலவில் கால்பதிக்கும் முதல் பெண்மணி மற்றும் முதல் கறுப்பினத்தவர் (First person of color) ஆர்டெமிஸ் திட்டத்தின் மூலமே அங்கு செல்லவுள்ளனர். ஸ்பேஸ் எக்ஸ், ப்ளூ ஆரிஜின் போன்ற தனியார் நிறுவனங்களுடன் இணைந்து நாசா செயல்படுவது ஒரு புதிய மாற்றமாகும். நிலவில் நிரந்தரத் தளங்களை அமைப்பதன் மூலம், எதிர்காலத்தில் செவ்வாய் கிரகத்திற்குச் செல்வதற்கான ஒரு பயிற்சித் தளமாக நிலவைப் பயன்படுத்தத் திட்டம் உள்ளது. நிலவு என்பது இனி 'ஃபினிஷிங் லைன்' அல்ல; அது மனித குலத்தின் அடுத்த கட்டப் பயணத்திற்கான ஒரு 'தொடக்கப் புள்ளி'. இந்த முறை நாம் நிலவுக்குத் திரும்புவது வெறும் வருகைக்காக அல்ல, அங்கு நிரந்தரமாகத் தங்குவதற்காக. இதனால்தான் இந்தத் தாமதங்களும், கூடுதல் சோதனைகளும் தவிர்க்க முடியாததாகின்றன.
இந்தச் செய்தி The Indian Express ஊடகத்தில் வெளியிடப்பட்டது. மேலும் விரிவான தகவல்களுக்கு மூல கட்டுரையைப் படிக்கவும்.
