திருவெண்காடு: மயிலாடுதுறை மாவட்டம் சீர்காழி அருகே அமைந்துள்ள புகழ்பெற்ற திருவெண்காடு சுவேதாரண்யேஸ்வரர் சுவாமி திருக்கோயிலில், தமிழ் புத்தாண்டு மற்றும் சித்திரை மாதப் பிறப்பை முன்னிட்டு இன்று மிகச்சிறப்பான தீர்த்தவாரி மற்றும் சிறப்பு அபிஷேக ஆராதனைகள் நடைபெற்றன. இதில் ஏராளமான பக்தர்கள் கலந்துகொண்டு புனித நீராடி சுவாமி தரிசனம் செய்தனர். காசிக்கு இணையான திருத்தலம் நவகிரகத் தலங்களில் கல்வி மற்றும் அறிவுக்கு அதிபதியான புதன் பகவானுக்குரிய பரிகாரத் தலமாக திருவெண்காடு விளங்குகிறது. காசிக்கு இணையான ஆறு சிவத்தலங்களில் முதன்மையானதாகப் போற்றப்படும் இத்தலம், சமயக் குரவர்கள் நால்வராலும் பாடல் பெற்ற பெருமையுடையது. இங்கு வித்யாம்பிகை சமேத சுவேதாரண்யேஸ்வரர் சுயம்பு மூர்த்தியாக எழுந்தருளி பக்தர்களுக்கு அருள்பாலித்து வருகிறார். தீர்த்தவாரி வைபவம் இக்கோயிலின் தனிச்சிறப்பே இங்குள்ள மூன்று தீர்த்தங்கள் (சூரிய, சந்திர, அக்னி தீர்த்தம்), மூன்று தல விருட்சங்கள் மற்றும் மூன்று அம்பாள் சன்னதிகள் ஆகும். தமிழ் புத்தாண்டை முன்னிட்டு இன்று அதிகாலையிலேயே கோயில் நடை திறக்கப்பட்டு, சுவாமிக்கும் அம்பாளுக்கும் சிறப்பு அபிஷேகங்கள் நடைபெற்றன. இதனைத் தொடர்ந்து, உற்சவ மூர்த்திகள் தீர்த்தக் கரைக்கு எழுந்தருள, அஸ்திர தேவருக்கு பால், தயிர், இளநீர் உள்ளிட்ட திரவியங்களால் சிறப்பு அபிஷேகம் செய்யப்பட்டது. பின்னர், மூன்று தீர்த்தக் குளங்களிலும் அஸ்திர தேவர் புனித நீராடும் தீர்த்தவாரி' நிகழ்ச்சி கோலாகலமாக நடைபெற்றது. அப்போது குளக்கரையில் திரண்டிருந்த நூற்றுக்கணக்கான பக்தர்கள் 'தென்னாடுடைய சிவனே போற்றி' என முழக்கமிட்டு, குளத்தில் புனித நீராடினர். இந்தத் தீர்த்தங்களில் நீராடினால் எம பயம் நீங்கும் என்பதும், குழந்தை பாக்கியம் கிட்டும் என்பதும் பக்தர்களின் தீராத நம்பிக்கையாக உள்ளது. புதன் பகவானுக்கு 11 வகை திரவிய அபிஷேகம் புதன் பகவான் தனிச் சன்னதியில் வீற்றிருக்கும் இத்தலத்தில், தமிழ் புத்தாண்டு தினத்தில் கல்வி மற்றும் தொழிலில் மேன்மை அடைய வேண்டி விசேஷ பூஜைகள் நடத்தப்பட்டன. புதன் பகவானுக்கு பால், தயிர், சந்தனம், பன்னீர், தேன், இளநீர், விபூதி உள்ளிட்ட 11 வகையான வாசனைத் திரவியங்களைக் கொண்டு மகா அபிஷேகம் நடைபெற்றது. பின்னர் பச்சை வஸ்திரம் உடுத்தி, மல்லிகை மற்றும் நறுமண மலர்களால் அலங்கரிக்கப்பட்டு மகா தீபாராதனை காண்பிக்கப்பட்டது. இந்த பூஜைகளை ராமநாதன் குருக்கள் தலைமையிலான சிவாச்சாரியார்கள் முறைப்படி செய்து வைத்தனர். புதன் பகவானை தரிசித்தால் திருமணத் தடைகள் நீங்கி, கல்வி மற்றும் வேலைவாய்ப்பில் சிறந்து விளங்கலாம் என்பதால், வெளியூர்களில் இருந்தும் ஏராளமான மாணவர்கள் மற்றும் இளைஞர்கள் இன்று இத்தலத்திற்கு வருகை தந்திருந்தனர். சித்திரை முதல் நாளை முன்னிட்டு அதிகாலை முதலே திருவெண்காடு மற்றும் அதன் சுற்றுவட்டாரப் பகுதிகளான சீர்காழி, பூம்புகார், வைத்தீஸ்வரன் கோயில் ஆகிய இடங்களிலிருந்து ஏராளமான பக்தர்கள் திரண்டனர். இதனால் கோயில் பிரகாரங்கள் மற்றும் குளக்கரைகளில் மக்கள் கூட்டம் அலைமோதியது. ஆதி சிதம்பரம் என்று அழைக்கப்படும் இத்தலத்தில், மெய்கண்டார் அவதரித்த பெருமையும், பட்டினத்தடிகளார் சிவதீட்சை பெற்ற வரலாற்றுச் சிறப்பும் உண்டு. இங்குள்ள அகோர மூர்த்தி சன்னதியிலும் இன்று சிறப்பு வழிபாடுகள் நடைபெற்றன. நிகழ்ச்சிக்கான ஏற்பாடுகளை இந்து சமய அறநிலையத்துறை அதிகாரிகள் மற்றும் கோயில் பணியாளர்கள் செய்திருந்தனர். பாதுகாப்பு கருதி திருவெண்காடு காவல்துறையினர் முக்கிய இடங்களில் பாதுகாப்புப் பணியில் ஈடுபட்டனர். தமிழ் புத்தாண்டையொட்டி திருவெண்காடு திருத்தலமே விழாக்கோலம் பூண்டிருந்தது.
திருவெண்காடு சுவேதாரண்யேஸ்வரர் கோயிலில் தமிழ் புத்தாண்டு சிறப்பு தீர்த்தவாரி: புதன் பகவானுக்கு மகா அபிஷேகம்!
|4 நாள் முன்|எஸ்.ஜெகநாதன், மயிலாடுதுறை
