வைரம் என்றாலே செல்வம், அந்தஸ்து மற்றும் ஆடம்பரத்தின் அடையாளமாகவே பார்க்கப்படுகிறது. தங்கத்தை போலவே வைரமும் காலப்போக்கில் அதிக லாபத்தைத் தரும் என்று பலர் நம்பி வாங்குகிறார்கள். ஆனால், எதார்த்த நிலை என்னவோ அதற்கு நேர்மாறாக உள்ளது. வைரங்கள் வாங்கும் போது அதிக விலை கொண்டதாகவும், விற்கும் போது முதலீட்டிற்கு ஏற்ற லாபத்தை தராத ஒன்றாகவும் இருப்பது ஏன் என்பது குறித்த விரிவான அலசலை இங்கே காண்போம். சமீபத்திய தரவுகளின்படி, வைரங்களின் விலை இந்த நூற்றாண்டில் இல்லாத அளவிற்கு பெரும் சரிவைச் சந்தித்துள்ளது. வைர விலைக் குறியீடு (Diamond Price Index) 8,500 என்ற நிலையில் இருந்து தற்போது சுமார் 3,500 என்ற அளவிற்கு அதிரடியாகக் குறைந்துள்ளது. உலகளாவிய பொருளாதார மந்தநிலை அல்லது பெரிய போர் பதற்றங்கள் இல்லாத சூழலிலும் இந்த விலை வீழ்ச்சி ஏற்பட்டிருப்பது முதலீட்டாளர்களை அதிர்ச்சியில் ஆழ்த்தியுள்ளது. வாங்கும் போது ஏன் அதிக விலை? நாம் ஒரு வைரத்தை வாங்கும்போது, அதன் உண்மையான மதிப்பிற்கு மட்டும் பணம் செலுத்துவதில்லை. அந்த வைரத்தின் விலையில் பிராண்டிங் (Branding), விளம்பரச் செலவுகள், விற்பனையாளரின் லாபம் மற்றும் செய்கூலி என பல கூடுதல் கட்டணங்கள் மறைந்துள்ளன. தங்கத்திற்கு தினமும் ஒரு நிலையான சந்தை விலை இருப்பது போல, வைரத்திற்கு வெளிப்படையான ஒரு விலை நிர்ணய முறை கிடையாது. இதனால், ஒரே தரத்தையுடைய இரண்டு வைரங்கள் வெவ்வேறு கடைகளில் வெவ்வேறு விலைக்கு விற்கப்படுகின்றன. இந்த வெளிப்படைத்தன்மை இல்லாததே வைரத்தின் விலை எட்டாக்கனியாக இருப்பதற்குக் காரணம். மறுவிற்பனையில் இருக்கும் சிக்கல்கள் வைரங்களை ஒரு சிறந்த முதலீடாகக் கருத முடியாததற்கு மிக முக்கியமான காரணம் அதன் மறுவிற்பனை மதிப்பு (Resale Value) ஆகும். தங்கத்தை உலகின் எந்த மூலையில் வேண்டுமானாலும் அன்றைய சந்தை விலைக்கு உடனடியாக விற்றுப் பணமாக்க முடியும். ஆனால், வைரங்களுக்கு அத்தகைய வலுவான மறுவிற்பனைச் சந்தை கிடையாது. ஒருவர் தான் வாங்கிய வைரத்தை மீண்டும் விற்க முற்படும்போது, வாங்கிய விலையை விட மிகக் குறைந்த விலையையே பெற முடிகிறது. பல நகைக்கடைக்காரர்கள் வைரங்களை மீண்டும் வாங்க முன்வருவதில்லை, அல்லது மிகக் குறைவான விலைக்குக் கேட்கிறார்கள். வாங்கிய விலைக்கும் விற்கும் விலைக்கும் இடையே உள்ள இந்த மிகப்பெரிய இடைவெளி வைரத்தை ஒரு மோசமான முதலீடாக மாற்றுகிறது. வைரச் சந்தையில் ஏற்பட்டுள்ள இந்த மாற்றத்திற்கு மிக முக்கியக் காரணம் 'லேப்-குரோன்' (Lab-Grown Diamonds) எனப்படும் ஆய்வகத்தில் தயாரிக்கப்படும் வைரங்கள் ஆகும். இவை வேதியியல் ரீதியாகவும், தோற்றத்திலும் இயற்கை வைரங்களை அப்படியே ஒத்திருக்கின்றன. இயற்கை வைரங்கள் உருவாக பல மில்லியன் ஆண்டுகள் ஆகும் நிலையில், இந்த வகை வைரங்களை வெறும் 14 மணி நேரத்தில் உருவாக்கிவிட முடியும். 2015-ம் ஆண்டுடன் ஒப்பிடும்போது, இவ்வகை வைரங்களின் உற்பத்திச் செலவு 90% குறைந்துள்ளது. தற்போது ஒரு ஆய்வக வைரத்தை 300 டாலருக்கும் குறைவான செலவில் தயாரிக்க முடிகிறது. அமெரிக்கா போன்ற நாடுகளில் 45% நிச்சயதார்த்த மோதிரங்கள் தற்போது செயற்கை வைரங்களிலேயே செய்யப்படுகின்றன. மலிவான விலையில் அதே தரத்தில் வைரங்கள் கிடைப்பதால், இயற்கை வைரங்களுக்கான மவுசு குறைந்து வருகிறது. தங்கம் vs வைரம்: எது சிறந்தது? முதலீட்டு ரீதியாகப் பார்த்தால் தங்கம் இப்போதும் ஒரு பாதுகாப்பான புகலிடமாகவே உள்ளது. கடந்த இரண்டு ஆண்டுகளில் தங்கத்தின் விலை 100% க்கும் மேல் உயர்ந்துள்ளது. தங்கத்திற்கு தெளிவான விலை நிர்ணயம் மற்றும் எப்போது வேண்டுமானாலும் பணமாக்கும் வசதி (Liquidity) உள்ளது. ஆனால், வைரங்கள் பெரும்பாலும் உணர்வுப்பூர்வமான மதிப்பைக் கொண்ட நுகர்வுப் பொருளாகவே (Consumption) பார்க்கப்பட வேண்டும். சுருக்கமாகச் சொன்னால், வைரங்களை அழகிற்காகவும், மகிழ்ச்சிக்காகவும் வாங்கலாமே தவிர, பிற்காலத்தில் லாபம் தரும் ஒரு முதலீடாக எண்ணி வாங்குவது ஏமாற்றத்தையே தரும். சந்தை மாற்றங்களை உணர்ந்து, நிதி சார்ந்த முடிவுகளை எடுப்பதே புத்திசாலித்தனம்.
இந்தச் செய்தி The Indian Express ஊடகத்தில் வெளியிடப்பட்டது. மேலும் விரிவான தகவல்களுக்கு மூல கட்டுரையைப் படிக்கவும்.
