இயக்குநர் செல்வராகவன் இயக்கத்தில் கார்த்தி, ஆண்ட்ரியா, ரீமா சென் நடிப்பில் வெளியாகி, தமிழ் சினிமாவின் மிகமுக்கியமான 'கல்ட் கிளாசிக்' படமாகப் போற்றப்படுவது ‘ஆயிரத்தில் ஒருவன்’. இந்தப் படத்தின் 2-ம் பாகத்திற்காக ரசிகர்கள் பல ஆண்டுகளாகக் காத்திருக்கும் நிலையில், அப்படத்தில் நடித்த நடிகை ஆண்ட்ரியா தற்போது வெளியிட்டுள்ள தகவல் ரசிகர்களிடையே அதிர்ச்சியை ஏற்படுத்தியுள்ளது. சமீபத்தில் ஒரு நிகழ்வில் கலந்துகொண்ட ஆண்ட்ரியாவிடம் ‘ஆயிரத்தில் ஒருவன் 2’ குறித்துக் கேள்வி கேட்கப்பட்டது. அதற்குப் பதிலளித்த அவர், ஆயிரத்தில் ஒருவன் 2-ல் நான் நடிப்பேன் என்று எதிர்பார்க்க வேண்டாம். அந்தப் படம் உருவாவதில் எனக்கு மகிழ்ச்சிதான், ஆனால் அதில் நான் இருக்க மாட்டேன். இதற்குக் காரணம், இயக்குநர் செல்வராகவனுடன் பணிபுரிவது மிகவும் கடினமான ஒன்று எனத் தெரிவித்தார். மேலும், முதல் பாகத்திற்காக சுமார் 200 நாட்கள் படப்பிடிப்பு நடத்தியதாகவும், அந்த அனுபவம் தனக்கு பிந்தைய படங்களில் நடிப்பதை கச்சிதமாகவும் எளிதாகவும் மாற்றியதாகவும் அவர் குறிப்பிட்டார். சில ஆண்டுகளுக்கு முன்பு, தனுஷ் நடிப்பில் ‘ஆயிரத்தில் ஒருவன் 2’ உருவாகும் என்று செல்வராகவன் அதிகாரப்பூர்வமாக அறிவித்திருந்தார். இருப்பினும், அதன் பிறகு அந்தப் படம் குறித்த எந்தப் புதிய அறிவிப்பும் வெளியாகாமல் தாமதமாகி வருகிறது. இப்போது ஆண்ட்ரியாவின் இந்த வெளிப்படையான பேச்சு சமூக வலைதளங்களில் விவாதத்தைக் கிளப்பியுள்ளது. நடிப்பு மட்டுமன்றி இசைக் கச்சேரிகளிலும் கவனம் செலுத்தி வரும் ஆண்ட்ரியா, தற்போது பல முக்கியப் படங்களில் பிஸியாக உள்ளார். வெற்றி மாறனின் 'அரசன்' படத்தில் ஆண்ட்ரியா நடித்து வருகிறார். கோபி நயினாரின் 'மனுசி' படத்தின் படப்பிடிப்பு முடிவடைந்த நிலையில், சென்சார் சிக்கல்களால் வெளியீடு தள்ளிப்போயுள்ளது. மிஷ்கின் இயக்கத்தில் உருவான பிசாசு 2 படம் வெளியீட்டிற்குக் காத்திருக்கிறது. இறுதியாக இவர் நடிப்பில் வெளியான 'மாஸ்க்' திரைப்படம் ரசிகர்களிடையே நல்ல வரவேற்பைப் பெற்றது குறிப்பிடத்தக்கது.
இந்தச் செய்தி The Indian Express ஊடகத்தில் வெளியிடப்பட்டது. மேலும் விரிவான தகவல்களுக்கு மூல கட்டுரையைப் படிக்கவும்.
