பூமியில் சுமார் 9 லட்சத்திற்கும் அதிகமான தீவுகள் உள்ளன. ஒவ்வொன்றுக்கும் தனித்துவமான அடையாளம் உண்டு. சில தீவுகள் பசுமையால் மரகதத் தீவு என்றும், சில பூலோக சொர்க்கம் என்றும் அழைக்கப்படுகின்றன. ஆனால், குறிப்பிட்ட தீவு மட்டும் பல நூற்றாண்டுகளாக நெருப்புத் தீவு (Island of Fire) என்றழைக்கப்படுகிறது. அது எந்தத் தீவு? அங்கு நிஜமாகவே நெருப்பு எரிகிறதா? விரிவாகப் பார்ப்போம். பிலிப்பைன்ஸ் நாட்டின் மத்திய விசயாஸ் பகுதியில் அமைந்துள்ள சிறிய வெப்பமண்டலத் தீவுதான் 'சிிகுயிஜோர்' (Siquijor). 16-ம் நூற்றாண்டில் ஸ்பானியப் பயணிகள் இந்தத் தீவிற்கு வந்தபோது, இதற்கு இஸ்லா டெல் ஃபுயகோ (Isla del Fuego) அல்லது "நெருப்புத் தீவு" என்று பெயரிட்டனர். நெருப்புத் தீவு என்ற பெயரைக் கேட்டதும் இது ஏதோ எரிமலை நிறைந்த தீவு என்று நீங்க நினைக்கலாம். ஆனால் உண்மை அதுவல்ல. ஸ்பானியர்கள் இந்தத் தீவை நெருங்கியபோது, அங்கிருந்த 'மொலாவ்' மரங்களில் ஆயிரக்கணக்கான மின்மினிப் பூச்சிகள் மொய்த்துக் கொண்டிருந்தன. அந்தப் பூச்சிகளின் ஒளியால், இருட்டில் அந்தத் தீவே நெருப்பு பற்றி எரிவது போலப் பிரகாசமாக மின்னியது. தொலைவில் இருந்து கடலில் வரும் கப்பல்களுக்கு இந்தத் தீவு நெருப்பு வளையம் போலக் காட்சியளித்ததால், இதற்கு இந்தப் பெயர் வந்தது. மின்மினிப் பூச்சிகள் கூட்டமாக மரங்களில் அமர்ந்து ஒளிர்வதே இந்தத் தீவின் அடையாளப் பெயருக்குக் காரணம். நிலப்பரப்பு மற்றும் மக்கள் தொகை அடிப்படையில் பிலிப்பைன்ஸின் 3-வது சிறிய மாகாணம் இதுவாகும். ஸ்பானியர்கள் வருவதற்கு முன்பு, இங்குள்ள மரங்களின் பெயரால் இது 'கடுகாசன்' (Katugasan) என்று அழைக்கப்பட்டது. இந்தத் தீவு முழுவதும் சுண்ணாம்புக் கற்களால் ஆனது. இது ஒரு காலத்தில் இந்தத் தீவு கடலுக்கு அடியில் இருந்ததைக் காட்டுகிறது. கடற்கரையிலிருந்து வெகு தொலைவில் உள்ள விவசாய நிலங்களில் இப்போதும் ராட்சத சிப்பிகளின் புதைபடிவங்கள் கண்டறியப்படுகின்றன. இன்றும் இங்குள்ள மக்கள் பழங்கால மூலிகை மருத்துவம் மற்றும் ஆன்மீகச் சடங்குகளைப் பின்பற்றுகிறார்கள். இங்குள்ள ஒரு ராட்சத 'பலேடே' (Balete) மரத்தின் வேர்களில் ஊற்று நீர் உற்பத்தியாகிறது. இதற்கு மருத்துவக் குணம் இருப்பதாக நம்பப்படுகிறது. உலகிலேயே அதிக கடல்வாழ் உயிரினங்கள் வாழும் 'பவள முக்கோண' (Coral Triangle) பகுதியில் இந்தத் தீவு அமைந்துள்ளது. இங்குள்ள மாங்குரோவ் காடுகள் மற்றும் பவளப் பாறைகள் கடல் சூழலை மிக ஆரோக்கியமாக வைத்துள்ளன. மின்மினிப் பூச்சிகள் அதிகம் வாழ்வது இடத்தின் தூய்மையான மற்றும் ஆரோக்கியமான சுற்றுச்சூழலுக்குச் சான்றாகும். இன்று சிிகுயிஜோர் தீவு அதன் பெயருக்காக மட்டுமல்லாமல், அழகான கடற்கரைகள், நீர்வீழ்ச்சிகள், கத்தோலிக்க மரபுகளுடன் இணைந்த பழங்கால நாட்டுப்புற நம்பிக்கைகளுக்காகவும் சுற்றுலாப் பயணிகளைப் பெரிதும் ஈர்க்கிறது. நெருப்பு என்பது இங்கே அழிவைக் குறிக்கவில்லை; அது மின்மினிப் பூச்சிகள் வழங்கிய இயற்கையின் பேரொளியைக் குறிக்கிறது.
இந்தச் செய்தி The Indian Express ஊடகத்தில் வெளியிடப்பட்டது. மேலும் விரிவான தகவல்களுக்கு மூல கட்டுரையைப் படிக்கவும்.
